بتاع الإزاز

عم يا بتاع الإزاز ..

عايزة أشتري منك ..مراية
ترجَّع الناس العزاز ..
اللي كانوا عايشين معايا
تعالى …..
هقولك ع المزايا ..
شوف ياعم ….
عايزة منك بال .. طويل
أولا …
المقاس..
يكون كبير
والبرواز ..
من جماله يكون … خطير
ثانيا …
مش عايزاها تكون ..عادية
دي مراية الحبايب
اصل هبعتها هدية
أرد بيها كل غايب
… … …
إيه زهقت …؟
مش قولتلك طول لي بالك.. !
لسه بدري أوعى تزهق
يالله اسرح لي بخيالك
وانا ..
راح أكافأك
…… ……..
شوف يا سيدي
عايزة تعمل فيها حِلية
أقدر أمسكها بإيديه
..تعالى …
شوف مكانها
الجدار دا كله أنا
عملاه عشانها
دي مراية الذكريات
عايزة أبص فيها أشوف..
كل اللي فات
ولو قدرت أبص أشوف..
كل اللي مات
خلاص انا اختارت إسم..
سميتها مراية الحياة
كل نظرة جوا منها..
توري للقلب مناه
ترد روح سابت صاحبها لما تاه
تحيي نَفْس ماتت من ضغط الحياة
هااا … فهمت
يلا نفِّذ … لو قدرت
هات مرايتي اللي بيها
حلمت أعيش طعم الحياة
….. …… ……
آااه … ياعم
نسيت أقولك
أوعى حد يشوفها قبلي
لو سمحت
لأني غيورة جدا
وإن لقيت حد غيري
بص فيها..
هأبقى بسببك إنجرحت
……….
شكرا يا عم ..ألف شكر
……….
#نهلة_الديب